18.03.2021 | 21 сакавіка – Сусветны дзень паэзіі

 

 

Сусветны дзень паэзіі адзначаецца з 1999 года па ініцыятыве ЮНЭСКА і ўжо паспеў стаць традыцыйным для культурнай супольнасці свету. «Паэзія, – гаварылася ў рашэнні ЮНЭСКА, – можа стаць адказам на самыя вострыя і глыбокія духоўныя пытанні сучаснага чалавека, але для гэтага неабходна прыцягнуць да яе як мага шырэйшую грамадскую ўвагу». Гэты дзень садзейнічае развіццю паэтычнага слова, падтрымлівае моўную разнастайнасць і традыцыі паэтычных чытанняў, актуалізуе вершаванне поруч з іншымі родамі літаратуры і відамі мастацтва. Шчыра віншуем усіх творцаў і аматараў паэзіі, жадаем натхнення ў напісанні і ў чытанні вершаў!

Алесь Казека

«Я – часцінка маёй Беларусі»

 

Я – маленькая кропля з крыніцаў святых,

Што ваду жыватворчую маюць,

І зярнятка з мільёнаў зярняткаў жывых,

Што багацце Радзімы складаюць.

 

І, напэўна я тут не зраблю адкрыцця,

Я – звяно неўміручага роду,

Што на ніве бясконцага поля жыцця

Беларускім завецца народам.

 

З праўдай Божаю ставіцца Вера мая

Да людзей. Без хлусні і прымусу –

Гонар маю лічыцца часцінкаю я

Асвячонай зямлі беларусаў!

 

Азнаёміцца бліжэй з беларусскай паэзіяй Вы можаце

на абанеменце мастацкай літаратуры  111а - 4 к.

Запрашаем!